Author: Team Nagpur Updates

शहराच्या स्वच्छतेसाठी आणि नागरिकांच्या आरोग्यासाठी सफाई कर्मचारी नियमित कार्य करीत आहेत. आजच्या कोव्हिडच्या काळात सफाई कर्मचारी अहोरात्र सेवाकार्य बजावत आहेत. नागरिकांच्या आरोग्यासाठी कार्य करणा-या सर्व सफाई कर्मचा-यांच्या आरोग्याची काळजी घेणे ही मनपाची जबाबदारी आहे. कोव्हिडच्या संसर्गापासून बचाव व्हावा, तो झाल्यास तातडीने उपचार मिळावे यासाठी झोनस्तरावर सर्व सफाई कर्मचा-यांची कोव्हिड चाचणी करण्यात यावी, असे निर्देश महापौर संदीप जोशी यांनी दिले.

सफाई कर्मचा-यांचे प्रलंबित प्रश्न व कोव्हिड-१९मध्ये कार्यरत सफाई कर्मचा-यांचे प्रश्न निकाली काढण्यासंदर्भात महापौर संदीप जोशी यांनी सोमवारी (ता.५) आढावा बैठक घेतली. मनपा मुख्यालयातील डॉ.पंजाबराव देशमुख स्मृती स्थायी समिती सभागृहात झालेल्या बैठकीत स्थायी समिती सभापती विजय (पिंटू) झलके, सत्तापक्ष नेते संदीप जाधव, आरोग्य समिती सभापती वीरेंद्र कुकरेजा, अतिरिक्त आयुक्त संजय निपाने, उपायुक्त घनकचरा व्यवस्थापन डॉ. प्रदीप दासरवार, वैद्यकीय आरोग्य अधिकारी डॉ. संजय चिलकर, अतिरिक्त वैद्यकीय आरोग्य अधिकारी डॉ. भावना सोनकुसळे, आरोग्य विभागाचे राजेश लवारे, किशोर मोटघरे, अखिल भारतीय सफाई मजदूर काँग्रेसचे महाराष्ट्र प्रदेश अध्यक्ष जयसिंग कछवाह, नागपूर महानगरपालिका शाखा अध्यक्ष प्रदीप महतो, मोती जनवारे आदी उपस्थित होते.

नागपूर महानगरपालिकेतर्फे ‘आपली बस’मध्ये फिरते कोव्हिड चाचणी केंद्र तयार करण्यात आले आहेत. या चाचणी केंद्रांद्वारे प्रत्येक झोनमधील सर्व सफाई कर्मचा-यांची चाचणी करण्यात यावी. चाचणीमध्ये पॉझिटिव्ह आढळणारे व जोखमीच्या रुग्णांवर मनपाच्या इंदिरा गांधी रुग्णालय, आयसोलेश हॉस्पिटल आणि आयुष रुग्णालयामध्ये उपचार करण्यात येईल. मनपाच्या या तिनही रुग्णालयांमध्ये नागपूर महानगरपालिकेच्या सर्व कर्मचा-यांकरिता राखीव बेड्स ठेवण्यात आले आहेत, असेही महापौर संदीप जोशी यांनी यावेळी सांगितले.

प्रारंभी उपायुक्त घनकचरा व्यवस्थापन डॉ.प्रदीप दासरवार यांनी संपूर्ण विषयांवर सविस्तर माहिती दिली. यावेळी अखिल भारतीय सफाई मजदूर काँग्रेसच्यावतीने प्रमुख मागण्यांची महापौरांना सूची सादर करण्यात आली. कोव्हिडमध्ये कार्य करीत असताना मृत्यूमुखी पडलेल्या बाधितांना ५० लाख विमा योजनेचा लाभ आणि परिवारातील सदस्याला अनुकंपा तत्वावर नियुक्ती देणे, सातवा वेतन आयोग लागू करणे, कर्मचा-यांच्या पगारातून कपात जीपीएफ रक्कम व त्यावरील व्याज २० दिवसाच्या आत संबंधिताच्या बँक खात्यात जमा करून वार्षिक हिशोब पावतीचे वाटव करणे, शासनाच्या धोरणाप्रमाणे कोव्हिडमध्ये कार्यालयात ५० टक्के कर्मचारी उपस्थिती ठेवणे, कोव्हिड बाधितांचे अंत्यविधी कार्य करणा-यांना मोबदला देणे, ‘श्रम साफल्य’ योजने अंतर्गत कामगारांना घर बांधून देणे, शिल्लक ऐवजदार सफाई कामगारांना नियमीत करणे, सफाई कर्मचा-यांची क्वॉर्टर रजिस्ट्री करणे आदी मागण्या यावेळी संघटनेच्या वतीने करण्यात आल्या.

यासर्व मागण्यांची गांभीर्याने दखल घेत महापौर संदीप जोशी यांनी तात्काळ सोडविता येणारे प्रश्न मार्गी लावले. २२०६ ऐवजदार सफाई कामगार नियमीत करण्यात आले असून उर्वरित ३५० ऐवजदार सफाई कामगार तसेच शिल्लक सर्व ऐवजदार सफाई कामगारांना नियमित करण्याचा विषय तत्कालिन मुख्यमंत्री तथा विद्यमान विरोधी पक्षनेते देवेंद्र फडणवीस यांच्याशी संबंधित आहे. त्यामुळे यासंदर्भात त्यांच्याशी सविस्तर चर्चा करण्यात येईल, असे यावेळी महापौरांनी सांगितले.

याशिवाय कोव्हिड बाधितांचे अंत्यविधी कार्य करणा-या सफाई कर्मचा-यांना आता १ हजार रुपये मोबदला देण्यात येणार आहे. सफाई कर्मचा-यांच्या क्वॉर्टर रजिस्ट्री संदर्भात पुढील आठवड्यात स्थावर विभागाची बैठक बोलावण्याचेही निर्देश महापौर संदीप जोशी यांनी दिले.

News Credit To NMC

कोव्हिड काळात सेवा बजावणा-या शिक्षकांना भेडसावणा-या समस्या व त्याबाबत येणा-या तक्रारींची दखल घेत महापौर संदीप जोशी यांनी सोमवारी (ता.५) मनपा शिक्षक संघाच्या समस्यांचा आढावा घेतला.

मनपा मुख्यालयातील डॉ.पंजाबराव देशमुख स्मृती स्थायी समिती सभागृहात यासंदर्भात बैठक घेण्यात आली. महापौर संदीप जोशी यांच्या अध्यक्षतेत झालेल्या बैठकीत शिक्षक आमदार नागो गाणार, स्थायी समिती सभापती विजय (पिंटू) झलके, सत्तापक्ष नेते संदीप जाधव, शिक्षण समिती सभापती प्रा.दिलीप दिवे, उपसभापती प्रमोद तभाने, अतिरिक्त आयुक्त सर्वश्री राम जोशी, संजय निपाने, उपायुक्त निर्भय जैन, शिक्षणाधिकारी प्रिती मिश्रीकोटकर, अतिरिक्त वैद्यकीय आरोग्य अधिकारी डॉ. भावना सोनकुसळे, माध्यमिक शिक्षक संघाचे प्रमोद रेवतकर, मनपा शिक्षक संघाचे अध्यक्ष राजेश गवरे, प्रमुख सचिव देवराव मांडवकर, कोषाध्यक्ष मलविंदरकौर लांबा आदी उपस्थित होते.

यावेळी शिक्षक संघाद्वारे शिक्षकांच्या प्रमुख मागण्यांची सूची सादर करण्यात आली. झोनमध्ये कार्यरत शिक्षकांसोबत असभ्यतेची भाषा थांबविणे, शिक्षकांना कोव्हिड-१९च्या सेवेतून कार्यमुक्त करून साप्ताहिक रजा द्यावी, वाहतूक तसेच प्रोत्साहन भत्ता विनाविलंब देणे, सुरक्षा साहित्य उपलब्ध करणे, शिक्षकांना रात्रपाळीत काम न देणे, शिक्षकांना ५० लाखाचे विमा कवच देणे, ५५ वर्षावरील व विविध आजारांनी ग्रस्त शिक्षकांना कोव्हिड कार्यातून सूट देणे, ऑक्सिमीटरद्वारे तपासणीसाठी वैद्यकीय चमू नियुक्त करणे, कुटुंबातील सदस्य कोरोनाबाधित आल्यास शिक्षकांना गृहविलगीकरणात ठेवणे, मनपा शिक्षकांकरिता स्वतंत्र कोव्हिड रुग्णालयाची व्यवस्था करणे, कोव्हिड व ऑनलाईन शिक्षण अशा दोन्ही जबाबदा-या न ठेवता एका जबाबदारीतून मुक्त करणे, सातवा वेतन आयोग लागू करणे आदी प्रमुख मागण्या यावेळी करण्यात आल्या.

शिक्षकांच्या समस्या आणि त्यावरील प्रशासनिक भूमिका यांची माहिती महापौर संदीप जोशी यांनी जाणून घेतली. कोव्हिड-१९ अंतर्गत कार्य करणा-या शिक्षकांना त्यांच्या कार्याला अनुसरून आवश्यक ती सर्व सुरक्षा साहित्य उपलब्ध करून देण्याबाबत त्यांनी यावेळी निर्देश दिले. ५५ वर्षावरील आणि अस्थमा, मधुमेह, रक्तदाब यासह दिव्यांग, अपघातग्रस्त व विविध आजारांनी ग्रस्त शिक्षकांना सरसकट कोव्हिडच्या कार्यातून मुक्त करणे शक्य नाही.

आजच्या कोव्हिडच्या काळात कर्मचा-यांची गरज लक्षात घेता उपरोक्त शिक्षकांना बाहेरील काम न देता त्यांना झोनस्तरावर कार्यालयीन कामेच देण्यात यावी. याशिवाय ऑक्सिमीटरद्वारे तपासणीसाठी वैद्यकीय चमू नियुक्त करणे शक्य नसल्याचेही प्रशासनाद्वारे स्पष्ट करण्यात आले. त्यामुळे पुढील पर्याय निघेपर्यंत शिक्षकांनी संपूर्ण सुरक्षेसह कार्य करावे.

शिक्षकांच्या कुटुंबातील सदस्य कोरोनाबाधित झाल्यास बाधिताची काळजी घेण्यासाठी कुणी नसल्यास संबंधित शिक्षकांना सात दिवसाची रजा देण्याचे निर्देशही महापौरांनी यावेळी दिले. कोव्हिड-१९ व ऑनलाईन शिक्षण अशा दोन्ही जबबादा-या असणा-या शिक्षकांना एका जबाबदारीतून मुक्त करण्याच्या मागणीसंदर्भात ३ दिवसात आवश्यक माहिती सादर करण्याचेही निर्देश महापौरांनी दिले.


मनपा कर्मचा-यांसाठी राखीव बेड्स

मनपा शिक्षक व कर्मचारी कोरोनाबाधित झाल्यास त्यांच्याकरिता शहरात स्वतंत्र रुग्णालय आरक्षित करून विनामूल्य उपचार करण्याच्या शिक्षक संघाच्या मागणीची महापौर संदीप जोशी यांनी दखल घेतली. मनपातील शिक्षक आणि इतर कर्मचा-यांसाठी मनपाचे इंदिरा गांधी रुग्णालय, आयसोलेशन हॉस्पिटल आणि आयुष रुग्णालयात राखीब बेड्स ठेवण्यात येणार असल्याचे त्यांनी यावेळी सांगितले.

सातव्या वेतन आयोगासंदर्भात समिती गठीत

मनपा ठरावानुसार मनपा शिक्षक कर्मचा-यांना सातवा वेतन आयोग लागू करणे आणि शालार्थ प्रणालीत समाविष्ठ शिक्षक आणि कर्मचा-यांचे सहाव्या वेतन आयोगाचे थकबाकी बिल १८ महिन्यांपासून प्रलंबित असून यासंबंधी पुढील कार्यवाही करण्याच्या मागणी संदर्भात महापौरांनी शिक्षण समिती सभापतींच्या अध्यक्षतेत समिती गठीत केली. समितीमध्ये शिक्षण समिती सभापती, उपसभापती व अतिरिक्त आयुक्तांचा समावेश आहे. सदर समितीने संपूर्ण विषयासंदर्भातील अभ्यास करून ७ दिवसात अहवाल सादर करावा, असे निर्देश महापौर संदीप जोशी यांनी दिले.

News Credit To NMC

नागपूर महानगरपालिकेच्या उपद्रव शोध पथकाचे जवानांनी सोमवार (५ ऑक्टोंबर) ला मास्क शिवाय फिरणा-या बेजबाबदार १९४ नागरिकांविरुध्द कारवाई केली असून त्यांच्याकडून प्रत्येकी रुपये ५०० प्रमाणे ९७ हजार रुपयांचा दंड वसूल केला. मागील काही दिवसात शोध पथकांनी १०१०५ नागरिकांविरुध्द कारवाई करुन रु. ३४,११,५००/- चा दंड वसूल केला आहे.

लक्ष्मीनगर झोन अंतर्गत ४५, धरमपेठ झोन अंतर्गत २७, हनुमाननगर झोन अंतर्गत १५, धंतोली झोन अंतर्गत १०, नेहरुनगर झोन अंतर्गत ६, गांधीबाग झोन अंतर्गत १५, सतरंजीपूरा झोन अंतर्गत १२, लकडगंज झोन अंतर्गत ८, आशीनगर झोन अंतर्गत २२, मंगळवारी झोन अंतर्गत ३० आणि मनपा मुख्यालयात ४ जणांविरुध्द सोमवारी ही कारवाई शोध पथकाचे प्रमुख विरसेन तांबे यांच्या मार्गदर्शनात करण्यात आली.

५०० रुपये प्रमाणे आतापर्यंत ४६३५ बेजबाबदार नागरिकांकडून रु २३ लक्ष १७ हजार ५०० वसूल करण्यात आले आहे.नागपूरात रुग्णांची संख्या सतत वाढत आहे तसेच मृतांची संख्या पण वाढत चालली आहे. यावर नियंत्रण करण्यासाठी महानगरपालिकेचे उपद्रव शोध पथक दररोज दहा ही झोनमधील मास्क शिवाय फिरणा-या बेजबाबदार नागरिकांविरुध्द कारवाई करत आहे. नागरिकांना कोरोनापासून वचक करण्यासाठी मास्क लावणे, सामाजिक अंतराचे पालन करणे, हात स्वच्छ धुणे इ.

ची सूचना नागपूर मनपा व्दारे वारंवार केली जात आहे. कोरोनाचा वाढता संसर्ग लक्षात घेता मास्क न वापणा-या नगारिकांना बचक बसावा व त्याची प्रभावी अंमलबजावणी व्हावी यादृष्टीने ही दंडाची रक्कम १५ सप्टेंबर पासून ५०० रुपये करण्यात आली आहे. तरीसुध्दा नागरिक मास्क शिवाय फिरत आहेत.

News Credit To NMC

नागपूर स्मार्ट ॲन्ड सस्टेनेबल डेव्हलपमेंट कारपोरेशन लिमिटेडच्या वतीने लागू करण्यात येणारे नागपूर सेफ ॲड स्मार्ट सिटी प्रोजेक्टच्या कामाचा आढावा पोलिस आयुक्त श्री. अमितेश कुमार यांनी मनपा च्या छत्रपती शिवाजी महाराज प्रशासकीय इमारतीमधील स्मार्ट सिटी कॉन्फरन्स हॉल मध्ये घेतला.

बैठकीचे आयोजन नागपूर स्मार्ट सिटीच्या ई-गर्व्हनेंस विभागाच्या वतीने करण्यात आले होते. बैठकीत अतिरिक्त पोलीस आयुक्त सर्वश्री. सुनील फुलारी, दिलीप झलके, एन.डी.रेडडी, पोलीस उपायुक्त सर्वश्री. विक्रम साळी, विवेक मसाळ, राहुल माकणीकर, गजानन राजमाने, श्वेता खेडकर, मनपाचे कार्यकारी अभियंता अजय मानकर, वाहतुक अभियंता शकील नियाजी व स्मार्ट सिटीचे मुख्य कार्यकारी अधिकारी श्री. महेश मोरोणे उपस्थित होते.

पोलिस आयुक्त श्री. अमितेश कुमार यांनी स्मार्ट सिटीच्या वतीने नागपूरात लावण्यात आलेले ३६०० सीसीटीव्ही कॅमे-याच्या माध्यमाने गुन्हेगारीवर नियंत्रण करण्यात येणा-या प्रयत्नांची प्रशंसा केली. ते म्हणाले की, कॅमे-यांच्या माध्यमाने गुन्हेगारांना पकडण्यात यश प्राप्त झाले आहे. येणा-या काळात या तंत्रज्ञानाचा अधिक वापर करुन गुन्हेगारीवर अंकुश लावण्यात येईल. त्यांनी सांगितले की, सीसीटीव्हीच्या माध्यमाने वाहतुकीला सुरळीत करण्याची आवश्यकता आहे.

यासाठी वाहतुक पोलिस विभाग व नागपूर स्मार्ट सिटीचे संयुक्त प्रयत्नांची आवश्यकता आहे. व्ही.ए.एम.एस च्या माध्यमाने वाहतुक पोलिस संबंधी जनजागृती करण्याचे पण त्यांनी निर्देश दिले. तसेच त्यांनी पोलिस नियंत्रण कक्षाजवळ सेन्ट्रल कमांड ॲन्ड कंट्रोल सेन्टर चे कार्याचा आढावा घेतला आणि हे काम नोव्हेंबर पर्यंत पूर्ण करण्याचे निर्देश संबंधीतांना दिले.‍ यापूर्वी पोलीस आयुक्त अमितेश कुमार यांचे स्वागत स्मार्ट सिटीच्या कंपनी सेक्रेटरी भानुप्रिया ठाकूर यांनी केले.

बैठकीच्या नंतर पोलिस आयुक्त अमितेश कुमार व अन्य अधिका-यांनी श्रध्देय अटल बिहारी वाजपेयी सिटी ऑपरेशन सेंटरची सुध्दा पाहणी केली. स्मार्ट सिटी ई-गर्व्हन्सचे जी.एम.डॉ. शील घुले यांनी त्यांना सिटी ऑपरेशन सेंटरच्या विविध कार्याची माहिती दिली. बैठकीत डॉ. शील घुले, ई. ॲन्ड वायचे समीर शर्मा, एल.ॲन्डटी.चे अजय रामटेके, आशीष भगत, अनूप लाहोटी, आरती चौधरी, कुणाल गजभिये आदी उपस्थित होते.

News Credit To NMC