कोरोना चे निदान करण्यासाठी संशयास्पद रुग्णांची तपासणी करण्यासाठी घशातील स्रावांचे नमुने घेऊन पाठवावे लागतात. हे करताना रुग्ण कोरोना बाधित आहे अथवा नाही हे ठाऊक नसते. त्यामुळे ही चाचणी घेणारे डॉक्टर आणि सहाय्यक यांच्या डोक्यावर सतत टांगती तलवार असते व आपल्याला कोरोना तर होणार नाही अशी भीती ही त्यांना सतत वाटत असते.
STOP कोरोना (Gadget for Safety To Operating Persons) हे एक उपकरण आहे ज्यामध्ये डॉक्टर आणि सहकारी एका बंद केबिन मध्ये उभे राहून, संशयित रुग्णाच्या संपर्कात न येता आजारी व्यक्तीच्या घशातील नमुने घेऊ शकतात. यामुळे आरोग्य कर्मचार्यांना संपूर्ण संरक्षण मिळेल. न घाबरता आरोग्य कर्मचारी काम करू शकतील. मुख्य म्हणजे हे करताना त्यांना PPE किट घालण्याची आवश्यकता राहणार नाही त्यामुळे या किट वर होणारा खर्च ही कमी करता येईल.
खासदार आणि पद्मश्री पुरस्कारप्राप्त नेत्रतज्ञ डॉ विकास महात्मे यांच्या संकल्पनेतून व वैयक्तिक देणगीतून हे साधन तयार केले गेले आहे आहे. हे उपकरण प्रत्यक्ष तयार करून घेण्यासाठी ऑरियस इन्स्टिट्यूट ऑफ हेल्थ सायन्सेस (स्टेट ऑफ आर्ट मल्टीस्पेशलिटी हॉस्पिटल, नागपूर) चे डॉ. परीक्षित महाजन आणि डॉ. अनंतसिंग सिंग राजपूत यांनी खास परिश्रम घेतले. खासदार डॉ विकास महात्मे यांनी आज हे उपकरण लोकार्पण करून शासकीय वैद्यकीय महाविद्यालयाला वापरण्यासाठी दिले. मेडिकलचे वैद्यकीय अधिक्षक डॉ. अविनाश गावंडे यांना हे उपकरण हस्तांतरित करण्यात आले.
