Category: NMC

नागपूर:- नागपूर शहरात उत्तर, मध्य व दक्षिण सिवरेज झोन अंतर्गत सिवर लाईन व चेंबर च्या देखभाल कार्याबाबत महापौरांमार्फत स्थायी समिती सभापती विजय (पिंटू) झलके यांच्या अध्यक्षतेत समिती गठीत करण्यात आली आहे. सोमवारी (ता.१४) मनपा मुख्यालयातील डॉ. पंजाबराव देशमुख स्मृती स्थायी समिती सभागृहात समितीची आढावा बैठक घेण्यात आली. बैठकीत स्थायी समिती सभापती विजय (पिंटू) झलके यांच्यासह सत्तापक्ष नेते संदीप जाधव, आरोग्य समिती सभापती वीरेंद्र कुकरेजा, ज्येष्ठ नगरसेवक दयाशंकर तिवारी, सार्वजनिक आरोग्य अभियांत्रिकी विभागाच्या प्रभारी अधीक्षक अभियंता श्वेता बॅनर्जी, प्रभारी कार्यकारी अभियंता (सांडपाणी व्यवस्थापन) राजेश दुफारे, कार्यकारी अभियंता सर्वश्री धनंजय मेंढुलकर, अनिल गेडाम,  विजय गुरूबक्षानी व दिलीप बिसेन आदी उपस्थित होते.
सदर प्रकल्प शहरातील नागरिकांना भेडसावणा-या सिवर लाईनच्या समस्या लक्षात घेवून दूरदृष्टीने तयार करण्यात आला आहे. त्याची योग्य अंमलबजावणी होणे आवश्यक आहे. या प्रकल्पाच्या अंमलबजावणीमध्ये अनेक अडथळे येणार आहेत. अनेक ठिकाणी सिवर लाईनवर अतिक्रमण असल्याने ते अतिक्रमण काढण्याची कारवाई आतापासून सुरू करणे अत्यावश्यक आहे. त्यादृष्टीने झोनस्तरावरून कार्यवाही सुरू करण्यात यावी. याशिवाय ज्या प्रभागात काम करावयाचे आहे, त्या प्रभागातील संबंधित नगरसेवकांना प्रकल्पाची माहिती देण्यात यावी व आवश्यक ठिकाणी त्यांचे सहकार्य घेण्यात यावे, असे निर्देश यावेळी स्थायी समिती सभापती विजय (पिंटू) झलके यांनी दिले.
गपूर शहरात उत्तर, मध्य आणि दक्षिण असे तीन सिवरेज झोन तयार करण्यात आले आहेत. या तिनही झोनमध्ये अनेक ठिकाणी सिवर लाईन खराब झाल्या आहेत. त्यामुळे नागरिकांना बराच त्रास सहन करावा लागतो. यावर कायमस्वरुपी उपाययोजना करून नागरिकांना दिलासा देण्यासाठी तयार करण्यात आलेल्या सिवर लाईन व चेंबर्स दुरूस्ती आणि देखभाल कामाचे प्रकल्प तयार करण्यात आले आहे. या प्रकल्पांतर्गत तिनही सिवर झोनमधील मल:निस्सारण शेवटपर्यंत सुव्यवस्थित व सुरळीत होणार आहे. त्यामुळे या प्रकल्पाची अंमलबजावणी करण्यासंदर्भात सदर कामाची आवश्यक निविदा प्रक्रिया तातडीने सुरू करा, असे निर्देश स्थायी समिती सभापती विजय (पिंटू) झलके यांनी दिले.
नागपूर शहराची नॉर्थ (सतरंजीपुरा, आसीनगर, मंगळवारी), सेंट्रल (धरमपेठ, गांधीबाग, लकडगंज) आणि साउथ (लक्ष्मीनगर, हनुमाननगर, धंतोली, नेहरूननगर) या तीन झोनमध्ये वर्गवारी करण्यात आली आहे. या तिनही झोनमधील सिवर लाईनच्या दुरूस्ती व देखभाल कार्यांतर्गत एकूण ६० किमी ची पाईपलाईन बदलविण्यात येणार आहे. या संदर्भात तयार करण्यात आलेल्या प्रकल्पाची माहिती देताना सार्वजनिक आरोग्य अभियांत्रिकी विभागाच्या अधीक्षक अभियंता श्वेता बॅनर्जी यांनी सांगितले की, तिनही झोन अंतर्गत कामे मंजुरीनंतर रीतसर तीन स्वतंत्र निविदा बोलावून करण्यात येतील. नियुक्त केलेल्या कंत्राटदारांमार्फत अस्तित्वातील व नव्याने प्रस्तावित करण्यात आलेल्या सिवरलाईन व चेंबर्सचे संपूर्ण नकाशे तयार करून घेण्यात येतील. कामात गती आणि सुसूत्रता येण्यासाठी नियुक्त कंत्राटादाराला प्रत्येक प्रभागात ४ कामगार व एक सुपरवाईजर ची टिम देणे अनिवार्य राहिल. प्रत्येक झोनच्या कार्यकारी अभियंत्यांमार्फत दैनंदिन स्वरूपात देण्यात येणा-या मागणी पत्रकाप्रमाणे कंत्राटदाराकडून प्रभागनिहाय काम पूर्ण करून घेणे अनिवार्य राहिल, असेही त्यांनी सांगितले.

नागपूर:- बुधवारी स्थायी समिती अध्यक्ष मा.श्री.विजय (पिंटू) झलके आणि मनपा आयुक्त श्री. राधाकृष्णन बी. यांनी हिरवी झंडी दाखवून ॲम्बुलन्स नागरिकांच्या सेवेत रुजू केली. यावेळी अतिरिक्त आयुक्त श्री. राम जोशी, उपायुक्त श्री. निर्भय जैन, वैद्यकीय आरोग्य अधिकारी डॉ. नरेन्द्र बर्हीरवार, सहा. आरोग्य अधिकारी डॉ. विजय जोशी, परिवहन व्यवस्थापक शकील नियाजी, प्रादेशीक परिवहन कार्यालयाचे मोटर वाहन निरीक्षक (RTO) सी.एच.जमधाडे व संजय फेंडारकर, मनपा परिवहन विभागाचे रविन्द्र पागे, अरुण पिपुरडे आदी उपस्थित होते.

नागपूर महानगरपालिकेच्या माध्यमातून २५ रुग्णवाहिका बुधवारपासून नागरिकांच्या सेवेत रुजू झाल्या आहेत. महानगरपालिकेत सध्या ४० रुग्णवाहिका कार्यरत असून त्यामध्ये २५ रुग्णवाहिकांची नव्याने भर पडली आहे. मा.महापौर श्री. संदीप जोशी आणि मनपा आयुक्त श्री. राधाकृष्णन बी. यांनी कोरोनाचा वाढता उद्रेक लक्षात घेता शहरातील नागरिकांसाठी जास्तीच्या रुग्णवाहिका घेण्याचे निर्देश दिले होते. अलिकडे कोरोना रुग्णांची संख्या वाढल्यामुळे रुग्णवाहिकेची कमतरता जाणवत होती.

स्थायी समिती अध्यक्ष मा.श्री. विजय झलके यांनी सांगितले की सद्या कोव्हीडचा प्रकोप वाढल्यामुळे रुग्णवाहिकेची कमतरता लक्षात घेता कोव्हीड रुग्णांसाठी ६५ ॲम्बुलन्सची व्यवस्था करण्यात आली आहे. ही रुग्णवाहिका नागरिकांना विना मूल्य उपलब्ध करुन दिली जाईल. यासाठी संबंधितांनी झोन कार्यालयामध्ये संपर्क साधावे.

आयुक्त श्री. राधाकृष्णन बी यांच्या निर्देशानुसार कोरोना बाधितांसाठी प्रत्येक झोन मध्ये चार रुग्णवाहिका उपलब्ध करुन देण्यात येणार आहे. कोव्हीड केअर सेंटर आणि मनपा मुख्यालयात देखील रुग्णवाहिका उपलब्ध राहतील. गरजेनुसार कोरोना बाधितांसाठी झोन कार्यालयमध्ये फोन करुन ॲम्बुलन्स मागविता येईल. पूर्वी मनपाकडे २० रुग्णवाहिका होत्या मागच्या आठवडयात त्यांची संख्या वाढवून ४० करण्यात आली आणि आता त्यामध्ये २५ ॲम्बुलन्संची भर पडणार आहे.

मनपा आयुक्तांनी रुग्णवाहिकेमध्ये पोर्टेबल ऑक्सीजन सिलेंडर, वाहन चालकासाठी मास्क, हँड ग्लोज (हात मोजे), सॅनिटायझर स्ट्रो ची व्यवस्था करण्याचे निर्देश दिले. ही रुग्णवाहिका नागरिकांसाठी २४ तास (24X7) उपलब्ध राहील. ‍

झोन स्तरावर कोरोना नियंत्रण कक्षाचे फोन नंबर
अ.क्र. झोन कार्यालयाचे नांव टेलीफोन नंबर
१ लक्ष्मीनगर झोन क्र.०१ 0712 – 2245053
२ धरमपेठ झोन क्र.०२ 0712 – 2567056
३ हनुमाननगर झोन क्र.०३ 0712 – 2755589
४ धंतोली झोन क्र.०४ 0712 – 2465599
५ नेहरुनगर झोन क्र.०५ 0712 – 2702126
६ गांधीबाग झोन क्र.०६ 0712 – 2739832
७ सतरंजीपूरा झोन क्र.०७ मो.नं.7030577650
८ लकडगंज झोन क्र.०८ 0712 – 2737599
९ आशीनगर झोन क्र.०९ 0712 – 2655605
१० मंगळवारी झोन क्र.१० 0712 – 2599905

नागरिकांच्या तक्रारी आणि नियमित कामांतर्गत १ जानेवारी ते ३० ऑगस्ट या आठ महिन्यांच्या काळात शहरातील सुमारे ५०३८ खड्डे नागपूर महानगरपालिकेच्या वतीने बुजविण्यात आले. सुमारे ९४२४० वर्ग फूट परिसर यामाध्यमातून समतल करण्यात आला. हॉट मिक्स प्लान्ट विभाग, जेट पॅचर मशीन आणि इन्स्टा रोड पॅचर मशीनद्वारे हे खड्डे बुजविण्यात आलेत.

महापौर श्री.संदीप जोशी यांनी आयोजित केलेल्या आढावा बैठकीत ही माहिती विभागा मार्फत देण्यात आली. महापौरांनी सांगितले नागपूर शहरात खडडयापासून नागरिकांना त्रास होत आहे. हॉट मिक्स प्लान्ट यांनी तात्काळ खडडे बुजविण्याची कारवाई करावी.
हॉट मिक्स प्लान्टच्या माध्यमातून झोननिहाय करण्यात आलेल्या कामांच्या माध्यमातून ८२५२२.८२ वर्ग मीटर क्षेत्र असलेले ३८७६ खड्डे बुजविण्यात आले. यासाठी स्क्रॅप ३४ ट्रीप, डब्ल्यूबीएम ३२८.५ ट्रीप, बीएम २० ट्रीप आसणि एस.डी.सी.सी./बी.सी. ३१५ ट्रीपचा वापर करण्यात आला. जेट पॅचरच्या माध्यमातून ४३२४.८२ वर्ग मीटर क्षेत्रातील ३१२ खड्डे तर इन्स्टा रोड पॅचरच्या माध्यमातून ७३९४.५७ वर्गमीटर क्षेत्र असलेले ८५० खड्डे बुजविण्यात आले. बैठकीत कार्यकारी अभियंता श्रीमती सोनाली चव्हाण, मॅकेनिकल इंजीनियर योगेश लुंगे, उप अभियंता कमलेश चव्हाण उपस्थित होते.

बुजविलेल्या खड्ड्यांची झोननिहाय माहिती

हॉट मिक्स प्लान्टच्या माध्यमातून १ जानेवारी ते ३० ऑगस्टदरम्यान बुजविण्यात आलेल्या खड्ड्यांची झोननिहाय माहिती पुढीलप्रमाणे आहे. लक्ष्मीनगर झोनमध्ये ९०६५.३४ क्षेत्रफळावरील ५२३ खड्डे, धरमपेठ झोनमध्ये ८४०२.१४ क्षेत्रफळावरील ३८५ खड्डे, हनुमाननगर झोनअंतर्गत ७४४०.४४ वर्गमीटर क्षेत्रफळावरील ३८० खड्डे, धंतोली झोनअंतर्गत ५९५५.९१ वर्गमीटर क्षेत्रफळातील २४८ खड्डे, नेहरूनगर झोनमध्ये १४९८७.८३ क्षेत्रफळावरील ६८० खड्डे, गांधीबाग झोनअंतर्गत ४६१७.९७ क्षेत्रफळावरील ३३४ खड्डे, सतरंजीपुरा झोनअंतर्गत २३५१.८ वर्गमीटर क्षेत्रफळ असलेले १३६ खड्डे, लकडगंज झोनअंतर्गत ५२८७.४९ वर्गमीटर क्षेत्रफळ असलेले २३१ खड्डे, आशीनगर झोनअंतर्गत ११३४४.७१ क्षेत्रफळावरील ३८४ खड्डे आणि मंगळवारी झोनअंतर्गत १३०६९.१९ वर्गमीटर क्षेत्रफळावरील ५७५ असे एकूण ८२५२२.८२ क्षेत्रफळावरील ३८७६ खड्डे हॉटमिक्स विभागाच्या माध्यमातून बुजविण्यात आले.

News Credit To NMC

नागपूर:- नागपूर महानगरपालिका प्रशासनाने अर्धवट सिमेंट रस्त्यांचे काम तात्काळ सुरु करावे, असे निर्देश महापौर श्री.संदीप जोशी यांनी सोमवारी दिले.

महापौर कक्षात सिमेंट रोडच्या कामाच्या संदर्भात आढावा सभेचे आयोजन करण्यात आले होते. या सभेला संबोधित करताना महापौर म्हणाले की, मागील सात महिन्यापासून कोव्हीड-१९ मुळे शहरातील अनेक सिमेंट रस्त्याचे काम अर्धवट स्थितीत पडले आहे. याचा नागरिकांना बराच त्रास देखील होत आहे. विशेषत: पावसाळयामध्ये अर्धवट सिमेंट रस्त्याच्या कामामुळे अनेकांच्या घरी पाणी देखील शिरले आहे ही स्थिती अत्यंत दयनीय आहे. कोव्हीडच्या परस्थितीत कोव्हीडवर लक्ष असणे अत्यंत स्वाभाविक आहे परंतु शहरातील अर्धवट असणा-या सिमेंट रोडची कामे देखील करणे गरजेचे आहे तरी या संदर्भात पुर्ण माहिती घेऊन तीन दिवसात अधिक्षक अभियंता श्री तालेवार यांनी आपला अहवाल दयावा व तात्काळ अर्धवट सिमेंट रोडच्या कामाला प्रारंभ करावा, असे निर्देश त्यांनी दिले.
या बैठकीत मा.महापौर श्री.संदीप जोशी यांचेसह सभापती वैद्यकीय सेवा व आरोग्य विशेष समिती श्री. विरेंद्र कुकरेजा, अतिरिक्त आयुक्त श्री.संजय निपाणे, अधिक्षक अभियंता श्री. मनोज तालेवार, प्रमुख लेखा व वित्त अधिकारी श्री. हेमंत ठाकरे तसेच संबंधित अधिकारी उपस्थित होते.

News Credit To NMC

नागपूर:- कोविड केअर सेंटर, नागरी प्राथमिक आरोग्य केंद्र आणि सूतिकागृह येथे चाचण्या घेतल्यानंतर पॉजिटिव्ह आढळलेल्या रूग्णांच्या संपर्काची तपासणी करणे महत्वाचे आहे. पॉजिटिव्ह रूग्णाच्या संपर्कातल्या तपासण्यांसाठी वेगाने संपर्क ट्रेसिंग करण्यासाठी एक द्रुत प्रतिक्रिया टीम तयार केली गेली आहे. या पथकाचे कामकाज वेगात करण्यासाठी मनपा आयुक्त राधाकृष्णन बी. यांनी निर्देश दिले. गुरुवारी त्यांनी पाचपावली कोविड केअर सेंटर, पाचपावली पीएचसी आणि सुतिकागृहाची अचानक पाहणी केली. अतिरिक्त आयुक्त जलज शर्मा हे यावेळी त्यांसह उपस्थित होते.

उच्च धोका असलेल्यांची कॉन्टैक्ट ट्रेसिंग आवश्यक: आयुक्त म्हणाले की, पॉजिटिव्ह रूग्णांच्या संपर्कात आलेल्या उच्च धोका असलेल्या लोकांस प्राधान्याने तपास काढत संपर्क साधावा. कोरोनाचा सतत वाढत असलेला संसर्ग लक्षात घेता, चाचण्यांची संख्या वाढविणे आवश्यक आहे. यासाठी शहरातील कोरोना टेस्ट सेंटरची संख्याही वाढविण्यात आली आहे.

परंतु तपासणी दरम्यान आवश्यक दक्षता ठेवली जाते की नाही, चाचणी विहित मुदतीत केली जाते की नाही, तपासणीसाठी येणार्‍या लोकांकडून याचे पालन केले जाते की नाही. याबाबत आढावा घेण्यासाठी आयुक्तांनी गुरुवारी अचानक आढावा दौरा घेतला.

नागरिकांनी जवाबदारी पाळावी: आयुक्तांनी सांगीतले कोरोनाची चिन्हे दिसू लागतात तेव्हा लपून राहू नये, स्वत:च तपासणीचा पुढाकार घ्यायला पाहिजे. जवळच्या तपासणी केंद्राला भेट देऊन त्वरित चौकशी करावी. या व्यतिरिक्त एखादी व्यक्ती जर एखाद्या सकारात्मक रूग्णाच्या संपर्कात येत असेल तर त्याने स्वत: मनपाच्या कोरोना इन्व्हेस्टिगेशन सेंटरमध्ये जाऊन जबाबदारीने चौकशी केली पाहिजे. सकारात्मक रूग्णात लक्षणे आढळल्यास रुग्णालयात दाखल होण्यासाठी केंद्रांवर संपर्क साधा आणि मार्गदर्शन मिळवा. ज्यासाठी त्यांनी 0712-2551866, 0712-2532474, 18002333764 या दूरध्वनी क्रमांकावर संपर्क साधण्याचे आवाहनही केले.